منار الإسلام
موقع تربوي تعليمي أكاديمي

مهمومة (قصيدة زجلية)

محمد فاضيلي

0

الغيوان قالوا: مهمومة،
ومعهم غنيت ونفسي مهمومة.
هاذ لبلاد راها مظلومة،
ومن حقوقها محرومة،
ولقلوب ولات مضيومة.
كثر الهم ،
وطلع الدم ،
وزاد السم،
ولمحبة، ولات مخرومة.
غلات لاسعار،
وقهرت الصغار، ولكبار،
ولخزاين صبحت متمومة.
وقفوا التشغيل،
وعلقوا التمويل،
وكثروا التهويل،
وقالوا هاذي حالة محتومة.
وحنا صدقنا،
حيث تفرقنا،
وتعلقنا،
فصراعات نتيجتها معلومة.
وأعداء الأمة
كيزيدو في السومة.
وحتى واحد ماقال حشومة.
هاذ لبلاد ماشي ضيعة،
فيها خدامة ،
يغرسو لقريعة،
وينتفو الزريعة،
هاذي بلاد السبوعة ،
قوتهم،
عرفتوها انتوما.
وصبرهم،
كيهرس لعظومة.
وعزيمتهم،
كتسد كل درقومة.

واللي من حكمتها محكومة
وميزانيتها معلومة
إنجازاتها صبحت معدومة.

وحنى باقين هوما ،هوما،
بغينا الخير،
والتغيير،
نديروه بالقومة.
نرجعو لله ،
نتوبو لله ،
نبكيو على الله ،
باش يرفع الظلم ،
ويحل السلم،
والرخا يعم،
ونعيشو عيشة مكرومة.
كلشي عند الله قريب،
حتى شي واحد فينا ماغريب،
ولا يجيه شي أمر صعيب،
ولا يخاف من اللومة.
التغيير نديروه احنا
وتديروه انتوما.
منبقاوش ساكتين،
وفي براركنا قانتين
هاذ الشي راه حشومة..

اترك رد

لن يتم نشر عنوان بريدك الإلكتروني.