منار الإسلام
موقع تربوي تعليمي أكاديمي

واش غير أنا (قصيدة زجلية)

واش غير أنا (قصيدة زجلية)/ شعيب البطار

0

واش غير أنا (قصيدة زجلية)

بقلم: شعيب البطار

واش غير انا للي في الهم
ولا غير خوتي في الحرفة صبارة
الفرحة يا صاح سومة غالية
ما عندي ليها يا وعدي شكارة
كيف ندخل سوق الدلالة
وما عندي يا راسي شطارة

واش غير انا للي في الهم
ولا غير خوتي في الحرفة صبارة
كيف ندخل جنة حلامي
ورعود ليام مازال هضارة
ورهوط ليام ما يردو سلامي
تايه بين البحور ما عندي صنارة

واش غير انا للي في الهم
ولا غير خوتي في الحرفة صبارة
كيف نكتب يا مولاي قصة ليام
وما قريت حروف ما درت زيارة
ما فتحت دواية ما زبرت قلام
لا بس لوقات وليام غدارة

واش غير انا للي في الهم
ولا غير خوتي في الحرفة صبارة
العقل مسوس من قلة حيلتي
والطريق شوك لسوق العطارة
كيف نطفي لجمار ونار حيرتي
لبيار مهجورة لا ساڴية لا خطارة

واش غير انا للي في الهم
ولا غير خوتي في الحرفة صبارة
قلت نجرب نطير ونعلي كيف لحمامة
موسم الطير دخلتو يا وعدي بلا شوارة
لقيت الفرحة شاكية باكية كيف لغمامة
موسم الطير دخلتو وخرجت بلا حزارة
واش غير انا للي في الهم
ولا غير خوتي في الحرفة صبارة

 

اترك رد

لن يتم نشر عنوان بريدك الإلكتروني.